Capa do libro Regatos polo aire
Un documental de Xacio Baño, un libro coordinado por María Lado e unha galería de fotografías históricas compoñen o proxecto Regatos polo aire. A firma Rebordelos promoveu esta iniciativa multimedia que se centra no papel das sellas de auga na sociedade tradicional.
Un dos principais contidos desta proposta é o documental de Baño, no que se retrata o traballo do artesán José Vicente Lagoa a fabricar estes recipientes, fundamentais para o subministro de augas ás casas na sociedade rural galega. Canda a isto, o volume do proxecto recolle textos de Xerardo Pereiro, Llerena Perozo, Carme Varela, Emma Pedreira, Suso Bahamonde, Diego Ameixeiras e Susana Sanches Aríns, a incluír unha galería de fotografías históricas centradas neste patrimonio.
Un espazo web a presentar o proxecto e achegar unha selección de contidos completan o proxecto, que contou co apoio do Fondo de apoio a proxectos culturais singulares para a mellora social 2025 da Deputación da Coruña.
