Falece Carlos Taboada, cofundador do colectivo Polo Correo do Vento

Carlos Taboada, fundador co colectivo Polo Correo do Vento e da firma Lela Edicións, falecía en Pontevedra este 13 de agosto de xeito repentino. Taboada, de 45 anos, desenvolveu un intenso labor editorial, como ilustrador e activista cultural en diferentes entidades.

Centrado na literatura infantil e xuvenil, foi autor en solitario de obras como A biblioteca de Pedrarcana e O caderno de Roque, publicado con xerais, e en colaboración con Enrique Mauricio asinou unha trintena de libros, na súa maior parte publicados por Lela Edicións, a incluír obras sobre diferentes persoeiros recoñecidos do Día das Letras Galegas. Apoiou esta produción con multitude de sesións de narración oral e obradoiros de ilustración que o fixeron coñecido por todo o país.

Entidades como o Salón do Libro, o Festival de Cans, a Asociación Galega do Libro Infantil e Xuvenil, a Asociación de Escritores en Lingua Galega, Edicións Xerais, o festival Sete falares, o Museo de Pontevedra ou a Consellería de Cultura amosaron o seu pesar polo pasamento.