Aparece unha xanela prerrománica na igrexa de Santa Eulalia de Esperante

Os traballos de restauración que está a desenvolver a Consellería de Cultura na igrexa de Santa Eulalia de Esperante, en Lugo, acaban de dar cun achado inesperado. O revestimento dun dos muros do templo agochaba unha ventá trilobulada, dunha tipoloxía da que ata o momento non había exemplos no noso país. Segundo recolle La Voz de Galicia, a peza presenta tres arcos de medio punto nun estilo propio do prerrománico presente na área de Asturias.

Os arcos apóianse en catro columnas romanas de mármore de estilo corintio, que provirían dunha suposta vila romana existente no lugar cara ao século IV. Os traballos puxeron ao descuberto tamén os dous grandes arcos, de preto de 10 metros de ancho, que se supón conectaban a nave principal do templo con outras dúas laterais que non chegaron aos nosos días. Os labores de investigación arqueolóxica continúan no lugar.