Fillas de Cassandra marcan os tempos lentos do artesanal

A creación artesá en diversas modalidades, a pausa, a construción social do tempo, son os eixos de reflexión sobre os que o dúo Fillas de Cassandra fixo medrar o traballo 'Hibernarse' (Altafonte, 2025) que ven de presentar en dúas accións no Museo MARCO e na Fundación Luís Seoane. Este EP, que contén catro temas (feito a man, arderse, quebrantarse e hibernarse) que foron facendo públicos ao longo dos pasados meses, vai máis alá do musical e as reflexións conceptuais que o inspiran trasládanse a outros formatos.

Tras dous anos prodigándose polos escenarios do país intensamente, o dúo fai agora virtude da pausa creativa e ofrece, neste 'Hibernarse' unha proposta multiformato que inclúa, ademais destes catro temas, un videofilme, un fanzine, unha colección de xoias (creada da man de Toda Frágil) e unha colección de bolsos da man de Que Se Queres Bolsa. Todos estes elementos conforman un universo no que María SOA e Sara Faro fan un chamado sobre a pausa necesaria que esixen os procesos creativos e artesanais. O novo traballo discográfico de Fillas de Cassandra, producido por Greta Ch’aska, Mumbai Moon e por elas mesmas, é o resultado dun proceso de maduración musical e discursiva fiado devagar polas artistas, que irromperon con forza no panorama musical galego coa publicación do seu aclamado álbum debut, Acrópole (2023, Tremendo Audiovisual). Esta nova proposta pretende tamén marcar un descanso na súa intensa actividade, o grupo asina unha defensa do traballo manual, da paciencia e da autenticidade da artesanía "como formas de resistencia fronte a un mundo gobernado pola rapidez, a uniformidade e a optimización da produtividade da industria moderna".