Anatomía dun presentador de Galicia

O Álbum de Galicia do Consello da Cultura Galega publicou esta semana a biografía de José María Castroviejo, unha das figuras máis destacadas e mediáticas da cultura galega durante o período franquista. Castroviejo procedía dunha familia culta da burguesía e baixa fidalguía galegas, que se moveu nos círculos do Seminario de Estudos Galegos e do grupo Nós ata a Guerra civil, onde loitou no bando nacional como requeté carlista. Trala guerra e tralo desencanto co goberno de Franco, insertouse na cultura e comunicación galegas, como director do xornal vigués El pueblo gallego, frecuente conferenciante, escritor e cazador, profundo coñecedor e narrador do medio rural, a gastronomía e a paisaxe do país. Castroviejo convertiuse, xunto con Álvaro Cunqueiro, nunha das figuras da cultura empregadas adoito para explicar Galicia tanto dentro como fóra das nosas fronteiras. A biografía, elaborada por Patricia Arias Chachero coa colaboración de María Castroviejo, dá conta das súas inquedanzas culturais, do seu círculo de amizades, a súa obra e as súas vicisitudes políticas e culturais.