O IX Premio Begoña Caamaño recoñece a Illa Bufarda e a Mala Herba Producións

A Deputación da Coruña daba a coñecer este 4 de xuño o fallo do IX Premio Begoña Caamaño á acción cultural pola igualdade de xénero. A produtora audiovisual Illa Bufarda fíxose co galardón que recoñece unha traxectoria, mentres Mala Herba Producións obtivo o que se destina á mellor iniciativa. Cada unha das categoría conta cunha dotación de 6.500 euros.

De Illa Bufarda, o xurado valorou "a súa produción audiovisual, que mestura o ensaio coa fotografía dende unha permanente e poliédrica ollada feminista". Tamén destacou "o seu compromiso coa lingua e o rescate da memoria das mulleres galegas, das traballadoras e das creadoras, cuestións que se reflicten ao longo da súa obra".

Encol Mala Herba Producións, o fallo sinala "que a cuestión da igualdade de xénero e LGTBI sexa a base do seu traballo de xeito transversal e central, ademais da defensa dos dereitos sociais, a súa labor de formación e visibilización do talento feminino no sector audiovisual e a utilización da cultura como ferramenta de transformación social".

A deputada de Cultura, Natividade González, presidiu o xurado, no que participaron como vogais Alexandre Garrido López, Beatriz Maceda, Carme Fernández Pérez-Sanjulián, Antares Pérez García-Zabarte e Alberte Mera. Como secretaria actuou Manuela Muñiz Souto, xefa do servizo provincial de Acción Social, Cultural e Deportes. Segundo comunica a institución provincial, presentáronse seis propostas aos galardóns.