Eladio y Los Seres Queridos danlle unha volta aos seus vinte anos de pequenos éxitos

Un novo son para unhas cancións que marcaron unha traxectoria de vinte anos sendo unha das bandas do pop galego máis persoais, iso é 'B.S.O. 2005 - 2025' (Esmerarte Industrias Creativas), o disco que ven de sacar a banda Eladio y Los Seres Queridos. Dezaseis temas escollidos da súa discografía destas pasadas dúas décadas composta por seis albumes, conforman o traballo que xa está nas plataformas dixitais. Temas que soaron moito pero aos que agora dáselles unha nova vida, tanto a través de arranxos e produción, como da propia gravación, ademais de contar para moitos deles con colaboracións de valor engadido que marcan diferenzas: Eva Amaral, Pucho de Vetusta Morla, Vega, Fillas de Cassandra, Depedro e Gala Santos, a filla de Eladio Santos. Un disco que máis alá de ser de coleccionista para os seguidores habituais da banda, dá nova vida e estes temas. O lanzamento chega acompañado dunha serie de vídeos oficiais de todas e cada unha das cancións, algúns que deles xa se foron presentado nas semanas pasadas.

Xustamente o disco ábrese con 'Non quero perderte', unha das cancións que conta con importantes colaboracións e que foi lanzada como un dos adiantos. Cantada integramente en galego, a canción reúne as voces únicas de Eva Amaral e Fillas de Cassandra. A canción formou parte orixinalmente do álbum 'Están ustedes unidos' de 2011. Con produción a cargo do propio Eladio Santos, 'B.S.O. 2005 - 2025' gravouse cos músicos tocando xuntos en directo, acadando un son completamente diferente, fresco e vital. Ademais diso os arranxos, dando máis protagonismo ao piano en varias das pistas, apoiándose moito nas partes instrumentais e explotando a intimidade da voz de Eladio, acada un ambiente íntimo e profundo. Sobre o disco Eladio, compositor de todos os temas, sinala: "BSO é a nosa historia en cancións, a Banda Sonora dos nosos 20 anos e é Orixinal porque ten o seu son e universo persoal. É unha pequena e modesta historia pero ten luz propia, por iso quizás ninguén a puido apagar".



O talento demostrado por Eladio y Los Seres Queridos nestes vinte anos quedou fixado, non só polo recordo dalgúns dos seus temas máis destacados como 'El tiempo futuro', 'Miss Europa' ou 'Con el corazón en la mano', por poñer só tres exemplos que podemos atopar revisados neste novo traballo, senón tamén a través de recoñecementos con candidaturas e premios tanto a nivel galego coma estatal; acasdando o Premio Maketón Los 40 Principales 2011 a Mellor Disco por 'Están Ustedes Unidos', o Premio Martín Códax da Música Galega a Mellor Grupo Indie/Pop en 2013 e 2018 e o Premio MIN de la Música Independiente 2017 a Mellor álbum en galego por 'Cantares'.


A finais de verán estará dispoñible este 'B.S.O. 2005 - 2025' en formato físico de vinilo. A banda xa ten datas confirmadas de presentación en directo, a primeira delas o vindeiro 20 de xuño no Festival Musicamino de Vilafranca del Bierzo (León), e arestora as primeiras datas confirmadas en terras galegas sinalan cara o outono, sendo a primeira o 3 de outubro no Teatro Afundación de Vigo (entradas xá a venda) e o 10 de outubro na Sala Riquela de Santiago de Compostela.