Máis de cen xacementos arqueolóxicos de Lugo afectados por prantacións forestais

A través das actualizacións dos conxuntos de fotografía aérea dispoñibles nos repositorios dixitais correspondentes a 2023 e 2024, Mariña Patrimonio e ADEGA realizaron un seguemento sobre os potenciais xacementos arqueolóxicos afectados polas repoboacións forestais. Posteriormente, as asociacións contrastaron sobre o terreo o localizado inicialmente desde o aire. O resultado son 101 xacementos afectados ao longo da provincia, que foron denunciados á Dirección Xeral de Patrimonio. Con todo, as asociacións observaron un padrón moi claro: na zona norte da provincia, comarca de A Mariña, só había sete xacementos afectados. No sur tampouco localizaron ningún caso. Pero o centro da provincia concentraba 94 xacementos que foran agredidos con plantacións forestais, nomeadamente de eucaliptos. Para Mariña Patrimonio e ADEGA, esta enorme desproporción débese a que "onde hai máis control cidadán e preocupación polo patrimonio, as empresas forestais e as persoas propietarias actúan con máis cautela. Na Mariña, tras anos de seguimento e denuncias por parte de Mariña Patrimonio e ADEGA, os xacementos reciben un maior respecto porque as intervencións forestais están vixiadas e hai un maior risco de que as infraccións sexan denunciadas". Segundo estas entidades, na zona central da provincial, "a falta dun control efectivo por parte da administración fixo desaparecer na práctica calquera protección real dos xacementos. A ausencia de vixilancia permite que moitos propietarios e empresas forestais actúen con total liberdade, sen temor a repercusións legais, perpetuando así a degradación do noso patrimonio".