Xabier Díaz publica un libro das coplas recollidas en máis de dúas décadas

No marco da celebración do Día das Letras Galegas dedicado ás cantareiras de tradición oral, o músico Xabier Díaz ven de auto-publicar o volume "Cancioneiro galego serodio 1989-2012", un libro e CD co que fai unha homenaxe a estas persoas fontes indispensables da tradición musical do país. Díaz presenta nesa publicación 600 das mais de 1.500 coplas que recolleu no período de tempo que indica, e 45 delas tamén achéganse gravadas no CD que acompaña ao libro. Este é un traballo que abrangue o total do territorio galego, as catro provincias, e mesmo os territorios arraianos, segundo explica Díaz.

O músico presenta este cancioneiro como "unha pequena pinga no tempo" polo seu ámbito temporal pero explica que "non por iso ten menos interese ou valor e mesmo trae descubertas e apuntes aos que non se lles tiña prestado atención, por difícil que poida parecer". Díaz apunta que o corpus do cancioneiro "dun país cantor e lírico por excelencia coma o noso, viaxou na memoria de miles de mulleres, xeración tras xeración ao longo do tempo, sen que poidamos atrevernos a datar o momento iniciático de tan fabulosa viaxe". A transcrición dos textos líricos das case cincocentas entrevistas que foron realizadas ao longo de trinta anos de camiño, vén adornada de anécdotas, sorpresas, e fantásticas historias das propias informantes, protagonistas tamén das fotos, e dunha morea de rexistro sonoros orixinais das compilacións, que redimensionan o concepto de cancioneiro, dándolle una dimensión próxima á experiencia que Díaz viviu en primeira persoa.