Fotografía da entrega de premios da MICE. Fonte: MICE
O Museo do Pobo Galego acollía este 16 de marzo o acto de entrega da vixésima Mostra Internacional de Cinema Etnográfico. O documental brasileiro Eros, de Rachel Daisy Ellis, fíxose co Premo AGANTRO á excelencia antropolóxica, dotado con 500 euros.
O xurado destacou desta produción o ser un "exercicio etnográfico entendido como un proceso participativo" que consegue "naturalizar algo tan socialmente construído como o sexo. Na cama, as e os participantes do filme falan de pracer, pero tamén de amor, relixión, política ou diversidade sexo-afectiva, algo que so é posible no espazo de seguridade que ofrecen estes moteis".
O xurado outorgou tamén unha Mención Especial a Silence of Reason, de Kumjana Novakova. A produción aborda a través de arquivos e testemuños a tortura e violacións sufridas polas mulleres durante a guerra en Bosnia e Herzegovina.
O comité de selección estivo composto pola doutora en Antropoloxía Social Bibiana Martínez Álvarez, o docente, crítico e programador de cinema Severiano Casalderrey e unha das fundadoras e codirectora do Porto Femme - Festival Internacional de Cinema Rita Capucho.
Corre o vento, de Paula Fuentes e Guillermo Cabrera, obtivo á súa vez o Premio MICE ao Mellor filme galego. A obra trata a situación de Vilar do Courel, nun "exercicio cinematográfico de carácter poético, que indaga no lendario dun territorio, ao tempo que manifesta o baleiramento do rural". Canda aos 500 euros deste premio, a peza fíxose tamén co Premio CREA que outorga Asociación de Profesionais da Dirección e a Realización.
O público, pola súa banda, outorgoulle o seu galardón á produción portuguesa Tão pequeninas, tinham o ar de serem já crescidas, de Tânia Dinis. O filme mestura arquivos fotográficos, imaxes reais e testemuños de mulleres das rexións de Trás-os-Montes, Beira, Alto e Baixo Minho que emigraron ao Porto entre 1940 e 1980 para traballar como empregadas domésticas.
