De Ninghures revisa a 'Feira' en urban-trad

Hoxe publicouse nas plataformas o novo traballo discográfico de 'De Ninghures', 'Feira, (Tremendo Audiovisual, 2025) é o segundo disco longo tras 'Aquí' (2022) e presenta sen medo unha revolución da sonoridade da banda. Se ben a base do seu traballo é a actualización do patrimonio tradicional, neste novo disco a banda métese de cheo no urban-trad e engade influencias latinas e árabes nalgúns temas. O resultado é unha proposta nova e fresca que coas referencias das foliadas, os seráns e as temáticas da tradición musical entran directamente nos sons electrónicos que caracterizan xa a unha xeración de artistas deste primeiro cuarto de século. Da man do produtor Juan De Dios Martín (Amaral, Xoel López, etc.), o grupo experimenta coa electrónica, coa utilización de novos instrumentos -ou usos renovados na súa instrumentación habitual- e a incorporación de efectos nas composicións. Nun dos temas 'Poço' tamén contan coa produción de Hevi. O disco pretende ser, como o seu nome indica, a carta de presentación dunha Feira do século XXI.


'Feira' (editado por Tremendo Audiovisual e distribuído por Altafonte) é un álbum conformado por dez cancións nas que De Ninghures traballa coa tradición popular galega dun xeito artesanal, cunha sonoridade e discurso moi característico, para levala á escena actual. Así, e coa incorporación de novas líricas, músicas e sonoridades, a agrupación revisita, actualiza e reivindica o patrimonio cultural do país. Ás xa coñecidas por teresn sido avanzadas, 'Corazón Alionado', 'A Burriña', 'O Último Baile' ou 'En fin, que máis dá' - tema no que colabora Xoel López nas guitarras-, publicadas nos últimos meses, únense 'Aquí', 'Descolorido', 'Feira' e 'Punteada'; mais tamén forman parte do disco temas con retrousos moi celebrados entre o público do país, como o exitoso 'Morena' -galardoado como Mellor Música do Ano 2023 en Galicia nos Premios Ari(t)mar, ou o comentado 'Poço', con produción de David Vieites, 'Hevi. O álbum contará con edición física en vinilo e presentarase ao vivo nun concerto o xoves 13 de marzo na Sala Capitol de Santiago de Compostela, para o que as entradas xa están á venda.