A RAG publica o volume coas achegas da IX Xornada de Onomástica

O Museo de Pontevedra acollía o pasado 19 de outubro a IX Xornada de Onomástica Galega. O encontro dedicouse nesta última xeira a "os outros nomes", aqueles propios que non se aplican nin a persoas nin a lugares. Agora a Real Academia Galega publica no seu web o volume que recolle as intervencións daquel encontro. Artigos sobre os nomes da ciencia, da intelixencia artificial e do ceo, dos grupos de pandeireteiras, dos fanzines e das mascotas atópanse nesta publicación.

O neurocientífico Xurxo Mariño trata nesta obra colectiva as cuestións dos nomes que se lle dan ás descubertas no mundo da investigación. Pola súa banda, as filólogas Adina Ioana Vladu, Elisa Fernández Rei e Noelia García e a enxeñeira Carmen Magariños reflexionan sobre as eleccións de nomes para voces artificiais. O divulgador Martin Pawley, á súa vez, aborda a necesidade de colaboración entre a comunidade científica e a RAG para mellorar e precisar as definicións das voces do dicionario.

Noemí Basanta recolleu e analizou para esta xornada medio milleiro de nomes de grupos de pandeireteiras, e Ramón Mariño explicou os títulos dos fanzines galegos desde os anos 90. A completar a obra, Anxos García Fontes amosa o seu traballo didáctico arredor dos nomes dos animais domésticos, unha cuestión na que tamén afonda Antón Palacio no seu texto.