Decoracións pétreas
Como xa é tradicional, o Parque Arqueolóxico da Cultura Castrexa de san Cibrán de Las publica a súa escolma de achados arqueolóxicos en Galicia. Do pasado 2024, o parque destacou como achado máis relevante os baixorrelevos atopados no castro de san Vicenzo (Avión), o sartego altomedieval cun depósito votivo no Preguntoiro (Pantón), a identificación hipotética dos restos do bispo Teodomiro, descubridor lendario das reliquias de Santiago, a fortificación da idade do Bronce, galaica e romana de Vilar de Barrio ou as escavacións na Pena Corneira (Leiro), onde se atoparon restos do castelo medieval canda unha necrópole romana e restos de hábitats tardoantigos ou prehistóricos. A lista continúa co proxecto de investigación do Incipit para detectar trazas arqueolóxicas e que levou á identificación de vinte novos castros na provincia da Coruña, o edificio romano de gran tamaño atopado no castro de Pereiras (Mos), o poboamento de hai máis de 5.000 anos no xacemento da Ceada das Chás/castelo de Lobarzán (Oímbra e Monterrei), os materiais romanos atopados preto da praia das Rodas, nas illas Cíes (Vigo) ou un asentamento de época sueva en san Vicente de Trigás (Mondoñedo).
