Co título Arquitecto da memoria a Real Academia Galega e mais a delegación coruñesa do Colexio Oficial de Arquitectos de Galicia lembran este 4 de decembro o arquitecto Andrés Fernández-Albalat. O acto de homenaxe, que conmemora o centenario do nacemento desta figura coruñesa, celébrase na sede do COAG na Coruña.
A homenaxe quere celebrar "a pegada cultural, profesional e persoal deste mestre da arquitectura galega" e contará coas intervencións do presidente da RAG, Víctor F. Freixanes e dos fillos do homenaxeado, Charo e Andrés Fernández-Albalat Ruíz, que son ademais xefa do Servizo de Patrimonio da Xunta de Galicia e profesor da Escola Técnica Superior de Arquitectura da Universidade da Coruña, respectivamente.
Canda a estas intervencións, tamén participarán no encontro Roberto Medín Guyatt, excolaborador de Albalat, Cristóbal Crespo González, director do Departamento de Proxectos Arquitectónicos e Urbanismo da Universidade da Coruña (DPAUC) e mais os antigos docentes deste departamento César Portela Jardón e Myriam Goluboff Scheps.
Segundo lembra a RAG, "defensor dunha arquitectura humanista ao servizo da sociedade, Andrés Fernández-Albalat dirixiu numerosos proxectos que o converteron nun referente imprescindible da Galicia contemporánea". O programa conta coa colaboración do DPAUC e da asociación cultural Flor de Santiago.
