O autor recibirá un premio en metálico de 4.000 euros e verá a súa obra publicada na colección Dombate da Editorial Galaxia. Desta dotación, 3.000 euros son en concepto de dereitos de autoría e 1.000 máis por impartir un obradoiro presencial de poesía en Gondomar entre xaneiro e marzo de 2025.
No seu fallo, o xurado valorou "a enunciación a través dunha voz épica e lírica a un tempo, a concepción da escrita como un oco a través do que se abre un bosque cunha capacidade de evocación insólita e a concepción da vida fluída e circular que integra corpo, natureza e escrita nunha relación intimamente ligada e horizontal". Canda a este traballo, foron declarados finalistas no certame os poemarios presentados baixo os lemas Antes da xabreira, e A illa sen reloxo.
A filóloga e tradutora Emma Lázare, Yaiza Peixoto, mestra e Presidenta de Espazo Lectura, Masha Álvarez, profesora e poeta gañadora da edición anterior, Tamara Andrés, escritora e tradutora e mais Miguel Anxo Mouriño, en representación do Instituto de Estudos Miñoráns, compuxeron o comité de selección.
O acto de entrega do galardón e a presentación do libro celebraranse no mes de marzo de 2025, a coincidir co cabodano do pasamento do poeta Victoriano Taibo.
