Margarita Ledo estrea 'Prefiro condenarme' no festival de Cine Europeo de Sevilla

O Festival de Cine Europeo de Sevilla acollerá o vindeiro día 9 de novembro a estrea mundial ao público do filme 'Prefiro condenarme' (Nós PCG, 2024), o novo traballo da cineasta Margarita Ledo Andíon (Castro de Rei, 1951). A película entrará en competición dentro da sección Las Nuevas Olas do festival hispalense e terá o seu primeiro pase ao público o sábado, 9 de novembro, ás 19:00 horas, repetindo o seguinte luns, día 11, ás 21:45 horas. Previamente o venres 8 habéra un pase para prensa e profesionais acreditados. 'Prefiro condenarme' chegará ás salas comerciais o vindeiro día 22 de novembro, en datas previas ao Día Internacional para a Eliminación da Violencia contra a Muller (25 de novembro).


Tras da premiada 'Nación' (2020), Margarita Ledo dirixe 'Prefiro condenarme' e asina o guión xunto con Eva Veiga. No filme, usando de novo a linguaxe da docu-ficción, a cineasta conta a historia real de Sagrario Fra, mariscadora de Ferrol á que en 1972 a Audiencia Eclesiástica de Santiago de Compostela xuzgou por cometer adulterio. Nese momento da nosa historia recente eran moitas as mulleres que eran encarceradas ou encerradas nun hospital psiquiátrico por ese motivo, considerado como acto criminal. A actitude de Sagrario Fra foi a de insubordinación. A película conta esta historia na que se entrelazan desexo, desobediencia e clase social no tempo da ditadura, en que cuestións como o chamado adulterio ou o abandono do fogar eran considerados "delitos específicos das mulleres". O filme rodouse nos meses de xaneiro e febreiro en distintas localizacións galegas como Lugo, Castro de Rei, Ferrol, Fene, Pontedeume o Santiago de Compostela, onde tamén puido gravar dentro da Catedral, entre outras localizacións. As actrices Melania Cruz, Iria Piñeiro e Mónica Camaño conforman a parte protagonista do elenco artístico.