Alfredo González Ruibal gana o Premio Nacional de Ensaio cunha novidosa visión da violencia

O arquéologo Alfredo González Ruibal, membro do Instituto de Ciencias do Patrimonio (INCIPIT) do CSIC, en Santiago de Compostela, ganou o Premio Nacional de Ensaio 2024 coa súa obra Tierra arrasada: un viaje por la violencia del Paleolítico al siglo XXI (Crítica). Segundo o xurado, a obra sobrancea por "apaixonante e novidosa forma de presentar os conflitos armados desde a experiencia e o punto de vista da arqueoloxía de campo. Na precisión do narrado, subxace a experiencia directa do autor en diferentes xacementos, o que fai posible escoitar as voces habitualmente silenciadas no relato frío e convencional das guerras, elevando a categoría da arqueoloxía de ciencia a ética". González Ruibal fíxose coñecido pola súa ampla interpretación da Gallaecia da Idade do Ferro e primeira romanización, na que interpretaba desde novidosos ángulos a diversidade cultural da Idade do Ferro. Nos últimos anos, as súas liñas de investigación levárono ata a arqueoloxía do colonialismo, a arqueoloxía da violencia e a do pasado contemporáneo, destacando nas intervencións en poboados marxinais do Madrid do século XX ou en espazos vinculados á Guerra civil e á represión franquista.