Unha investigación arqueolóxica documenta a arquitectura da explotación sexual en Galicia

Nos últimos anos, as fronteiras cronolóxicas da arqueoloxía estanse a expandir, incorporando novas cronoloxías, coma o pasado da guerra civil, e mesmo novas tipoloxías, como poden ser os prostíbulos. Os arqueólogos Xurxo Ayán e Carlos Otero veñen de publicar no último número da prestixiosa revista científica World Archaeology o traballo "Microhistorias dun castigo invisible. Por unha arqueoloxía da explotación sexual en España", na que documentan diferentes burdeis abandonados no contorno de cidades galegas como Lugo ou da estrada Nacional VI. Ayán e Otero estudan burdeis abandonados para comprender a estrutura da explotación, as fases de auxe do negocio da prostitución de estrada e as súas transformacións derivadas dos propios cambios na economía e na sociedade española.