O Museo de Pontevedra afonda na figura de Casto Méndez Núñez

Cando se fan 200 anos do nacemento de Casto Méndez Núñez, o Museo de Pontevedra dedícalle a este mariño vigués unha serie de actividades. Este 2 de outubro, a institución acolle o seminario No bicentenario de Casto Méndez Núñez, que comprende sete conferencias que abordan diferentes aspectos sobre a súa biografía e relevancia histórica.

A revolución naval do século XIX, o destacado papel do contraalmirante na mariña española desta centuria ou a súa presenza nas colección do Museo de Pontevedra e mais no Museo Naval de Madrid son algúns dos temas que se abordarán no encontro. Ademais, tratarase a contribución ao coleccionismo científico deste persoeiro e repasaranse os seus álbums fotográficos. Canda a estas intervencións, a entidade abre no claustro do edificio Sarmiento unha exposición temporal de fondos que conserva relacionados con esta figura.

Segundo destaca a presentación do proxecto, "ao longo dos seus 45 anos de vida, Méndez Núñez realizou unha brillante carreira militar na que o mando da escuadra española no Pacífico no combate do Callao -o 2 de maio de 1866- no que resultou ferido, supoñeríalle o seu ascenso a Xefe de Escuadra -Contraalmirante no cambio de denominación levado a cabo en 1868- e sobre todo unha gran popularidade, reflectida entón, entre outras cousas, en diversas homenaxes e felicitacións, a creación de composicións literarias e artísticas, ou a realización de monumentos no seu recordo".