Nada co lema "cinema, cultura e comunicación", a Casa da Galería, antigo domicilio familiar de Ledo, acollerá diferentes actividades e permitirá acceso a documentación vencellada ao traballo desta cineasta, escritora e investigadora do campo da comunicación.
Tamén estarán dispoñibles no lugar traballos da Produtora Nós, da que participa, canda a pezas de pintura galega e fondos hemerográficos e bibliográficos. O centro prevé tamén desenvolver de xeito habitual actividades para afondar no coñecemento da Terra Chá.
Xa para o mes de setembro, o programa de propostas continuará coa exposición de serigrafías Os Notábeis. Á volta de personaxes dun Castro de Rei do século pasado comisariada polo artista Bernardo Tejeda. O día 11 proxectarase o documental de Ledo Manuel María: eu son fala e terra desta miña terra que se acompañará dun faladoiro con Marica Campo, María Pilar García Negro e Alberto Ansede.
A coincidir con esta apertura, deuse a coñecer que a última produción audiovisual de Ledo, tamén titulada Prefiro condenarme, foi seleccionada para participar no prestixioso festival de Locarno na sección First Look.
