Fondo de taza con representación do posible crismón. Foto: Xunta de Galicia
Durante unha intervención arqueolóxica na zona de Os Castros, na parte alta da cidade de Mondoñedo, apareceron unha serie de materiais de época tardoantiga e entre eles o fondo dunha taza, no que aparece un grafito con sete liñas incisas radiais. O achado foi interpretado polos arqueólogos "como un crismón arcaico", asociado ao período do reino suevo entre os séculos V e VI. Significaría, segundo a Xunta de Galicia, "o achado máis antigo indicativo da presenza do cristianismo en Mondoñedo". O pasado 24 de xullo a Xunta cedeu a peza ao Museo Diocesano e Catedralicio de Mondoñedo para a súa exhibición por un periodo de cinco anos prorrogables. O crismón é unha figura representada con moita frecuencia durante os primeiros séculos do cristianismo e en soportes moi diversos.
