Morre Justo G. Beramendi, gran narrador do galeguismo político

Nesta mañá sorprendeunos a morte de Justo G. Beramendi, catedrático xubilado de Historia Contemporánea da USC e unha destacada figura da historiografía contemporánea galega. A súa capela ardente instalarse este xoves no auditorio do Museo do Pobo Galego, e estará aberta ao público entre as 10.00 e as 13.00, cando comece un acto en recordo do historiador. Beramendi era madrileño de nacemento e "galego por elección", como a el se gustaba definirse. De formación e experiencia técnica (estudara Enxeñaría Industrial en Madrid), orientouse cara a historia contemporánea, especializándose na historia política do galeguismo. Beramendi foi, sen dúbida, o gran articulador do discurso historiográfico sobre a formación do galeguismo político no século XIX, desde o movemento provincialista, o posterior papel do celtismo ou as sucesivas adaptacións e transformacións do modelo do galeguismo a través de diferentes fórmulas e circunstancias políticas. Neste sentido, o seu libro de referencia foi De provincia a nación: Historia do galeguismo político (Xerais, 2007), pero tamén prestou atención monográfica a grandes figuras como Alfredo Brañas, Manuel Murguía, Ramón Villar Ponte ou Vicente Risco. Beramendi tamén prestou atención ao proceso do estatuto A Galicia Autónoma. Os primeiros pasos da autonomía, 2008. A súa implicación na cultura galega foi tamén profunda: estivo vinculado ao padroado do Museo do Pobo Galego desde a súa constitución, en diferentes cargos e figuras, chegando a ser presidente desde o ano 2011 ata o 2022.


Reaccións
O Presidente da Xunta, Alfonso Rueda, pronunciouse trala morte de Beramendi, sinalando que era "unha peza clave na construción e fortalecemento da nosa cultura e historia". Pola súa banda, o conselleiro de Cultura da Xunta, José López Campos, destacou de Beramendi que era un "traballador incansable en prol das raíces dun pobo ao que elixiu pertencer". O Consello da Cultura Galega sumouse tamén ás condolencias destacando o seu papel como "unha das figuras referenciais para comprender, desde o punto de vista histórico, a articulación do galeguismo político entre os séculos XIX e XX". O concello de Santiago, localidade na que residía o profesor Beramendi, tamén se sumou ás condolencias.