Páxina do Fasciculus Temporum. Fonte: Biblioteca Franciscana
A Biblioteca Franciscana de Santiago de Compostela daba a coñecer o pasado 18 de xuño a aparición entre os seus fondos de catro volumes incunables dos que non se tiña noticia. A descuberta produciuse durante os traballos para localizar parte da colección de obras deste tipo xa rexistradas no seu catálogo, e dos que non se coñecía a localización. Con este achado, suman xa 76 o número de libros impresos antes do ano 1500 en posesión deste centro.
O interese por reunir a situación física da metade da colección de incunables da biblioteca, que nalgún momento se trasladou dentro das instalacións sen ficar rexistro da súa localización, motivou a investigación que deu no achado das catro novas pezas.
Segundo publicou a entidade nas súas redes sociais, os volumes que se incorporan á colección da Biblioteca Franciscana son Forma nouiciorum, do franciscano David de Augusta, impreso en Sevilla por Meinardo Ungut e Estanislao Polono en 1497. Do mesmo ano e orixe, Convento de Santo Antón de Herbón, é Explanatio Psalmorum, escrito por San Agustín e impreso en Basilea (Suíza) por Juan de Amerbach.
Canda a estes, a descuberta inclúe tamén a Vitae Pontificum, de Bartolomeo Platina impresa por Juan Rosso de Vercelis en Treviso (Italia) e mais o Fasciculus temporum, vel Chronica ab initio mundo, do monxe cartuxo Werner Rolevinck, impreso por Erhard Ratdolt en Venecia. Estes dous volumes proceden dos fondos da Congregación beneditina de San Mauro, e están datados no ano 1485.
A investigación permitiu tamén localizar os incunables que se atopaban perdidos entre os fondos da biblioteca, que se sitúa nas instalacións do convento compostelán de San Francisco.
