Co título Exeria e as mulleres na Gallaecia da Antigüidade tardía, o Concello da Cultura celebra o vindeiro 27 de xuño unha xornada dedicada a esta figura e ao seu contexto histórico. Segundo explica a presentación da xornada, a intención desta é "coñecer as últimas investigacións sobre a vida e obra de Exeria e situala no contexto actual da investigación sobre as mulleres da Gallaecia e Hispania tardoantigas, as súas vidas, a súa relación co cristianismo e a súa posición social".
O programa do encontro, que coordina Manuel Gago, inclúe unha conferencia de Ana María Suárez Piñeiro sobre A muller na Gallaecia romana. Henar Gallego, pola súa banda, abordará As mulleres na sociedade cristiá da Hispania tardoantiga e Eduardo López Pereira impartirá a palestra Exeria, primeira muller peregrina e escritora na Gallaecia. Os tres relatores concluirán a sesión cun coloquio.
Segundo sinala a institución "nos últimos anos, tanto en Galicia como no resto de Europa medra un renovado interese pola Antigüidade tardía e o seu legado" a lembrar que "a antiga Gallaecia destaca nesta época por un notable dinamismo cultural, político e económico, no que teñen unha importante presenza os autores cristiáns".
Neste contexto "brilla a figura da peregrina Exeria, hoxe reivindicada como a primeira muller das letras de Galicia". A autora escribiu un destacado Itinerario de viaxes a Terra Santa e Oriente Próximo, que só se coñeceu no século XIX.
