A Academia Galega de Teatro abre este xoves as súas Xornadas no Pazo de Mariñán

Este xoves, 23 de maio, darán comezo no Pazo de Mariñán as II Xornadas da Academia Galega de Teatro, que reunirán ata o día 25 a representantes de compañías teatrais, técnicos das administracións locais, estudosos e outros profesionais do sector escénico. Baixo o lema temático "O deseño das programacións teatrais galegas: na procura dun modelo cooperativo" esta nova edición das xornadas da AGT en Mariñán pretenden crear un espazo de reflexión sobre a natureza das artes escénicas como servizo público no que buscar un modelo conxunto de diálogo entre diversos axentes culturais que o integran (programadores/as e empresas escénicas) no marco da importancia para o sector e para o dereitos dos cidadáns das programacións culturais municipais.

Nesta cita organizada pola AGT co apoio da Deputación Provincial da Coruña e o patrocinio da Axencia Galega de Industrias Culturais da Xunta haberá espazos para debater os diferentes modelos de compañía de artes escénicas, os procedementos organizativos de deseño de programación de diferentes espazos municipais ou de outras entidades e tamén sobre o marco legal dos dereitos culturais. Para iso o programa contempla a participación de profesionais de diversas compañías como Chévere, Ibuprofeno Teatro, Pista catro ou Títeres Cachirulo, entre outros, así como de técnico programadores de varios concellos como , Ames, Vilagarcía, Vimianzo, Sada, Betanzos ou Muros. Todos eles analizarán a situación co fin de marcar uns puntos de encontro cuxo obxectivo é mellorar o sector escénico do noso país para o futuro.