Lanzan unha edición facsimilar da revista Vagalume con ocasión do seu 50 aniversario

En xaneiro de 1975 vía a luz o primeiro número da revista Vagalume, unha publicación pioneira orientada ao público infantil e xuvenil na nosa lingua. Ata 1978 chegarían aos quioscos 46 números desta cabeceira, na que o público lector era protagonista e ocupaba boa parte das páxinas coas súas colaboracións. Agora, a editorial Guiverny acaba de presentar unha edición facsimilar desta publicación a conmemorar o cincuenta aniversario do seu lanzamento.

O Museo de Pontevedra acollía o pasado 2 de maio o acto que daba a coñecer este volume, no que participaron Xosé Fortes, antigo director da cabeceira, canda aos colaboradores Alfonso Pexegueiro e César Portela. Canda a eles, participaron da publicación nomes coma Marta Isabel García de Leániz, Carlos Casares, Alfredo Conde, Pura Vázquez, Siro López, Manuel Moldes, Xoán Babarro ou Xosé María Méndez Doménech, promotor da cabeceira.

Para alén do seu carácter pioneiro como publicación infantil en galego, Vagalume tivo unha especial importancia no desenvolvemento da banda deseñada galega, a acoller traballos de autores como Oitabén, Xiráldez ou Saavedra Pita entre outros.

O volume que agora ve a luz recolle a totalidade de entregas publicadas, cada unha delas con entre 20 e 22 páxinas, ademais dunha introdución a explicar a importancia daquel proxecto. A obra ponse á venda a un prezo de 27 euros.