Entréganse os XX premios literarios Frei Martín Sarmiento

O venres pasado entregáronse os XX premios literarios Frei Martín Sarmiento, que anualmente organiza Escolas Católicas coa colaboración da Secretaría Xeral de Lingua. O certame ten a particularidade de que as obras gañadoras, clasificadas en sete categorías (por tramos educativos), son escollidas por tres mil alumnos destes centros privados. Os títulos seleccionados na categoría Infantil foron Caderno de cores e cancións, de Magín Blanco e Sonia García, como ilustradora, e está editado por Galaxia. Na de primeiro e segundo curso de Educación primaria foi distinguido Violeta parapluie e outras historias de xente pouco corrente de Ramón D. Veiga, publicada por Edicións Embora. Na segunda categoría establecida para alumnado de 3º e 4º de primaria, distinguiuse A pulga espacial de Xabier Domínguez e Alba de Evan, publicada por Edicións do Cumio. E na categoría de 5º e 6º, premiouse a Sálice e Sándalo, de Antela editorial. Nos premios para o 1º e 2º de ESO está Cituta para dous, de Xerais e na de 3º e 4ª de ESO distinguiuse o labor de tradución de Un feiticeiro de terramar traducido por Tomás G. Ahola e editado por Boadicea editora. Na categoría de Bacharelato e adultos, premiouse A saga das curandeiras, de Marisa Castro, publicado por Hércules de ediciones.