O pleno extraordinario co que a Real Academia Galega conmemora cada 17 de maio o Día das letras Galegas celebrarase neste 2024 no Teatro Rosalía de Castro da Coruña. A institución indicou que nesta xuntanza se realizarán tres intervencións sobre Luísa Villalta, autora homenaxeada nesta edición, a cargo das académicas Ana Romaní e Margarita Ledo e do académico Euloxio R. Ruibal. A sesión será de entrada libre a completar a capacidade do recinto.
De xeito previo, a revista Tempos Novos, coa colaboración da Asociación Cultural Alexandre Bóveda, organiza este 20 de abril ás 20 horas un coloquio sobre a autora. O local desta última entidade na coruñesa Rúa San Andrés acolle o encontro, conducido pola xornalista Montse Dopico e que contará coa participación de Mercedes Queixas, Beatriz Maceda e Pilar García Negro.
