Sesé Santiso reflexiona sobre as aparencias e o poder en Proxecto Peana

Ata o vindeiro 24 de maio a galería Marisa Marimón, en Ourense, acolle a exposición Proxecto Peana. Sesé Santiso achega neste proxecto unha selección de pezas que comparten a reflexión sobre "os egos, a autoestima, a necesidade de transcender, o recoñecemento, a falsa imaxe, as aparencias, a manipulación, o mérito, os valores, os ascensos e as caídas, o poder a fama, os símbolos, a imaxes que se nos oferta hoxe en día a través dos medios de comunicación e as redes convertidas en pedestais que se permiten potenciar ou impulsar a uns ao máis alto e deostar ou empequenecer a outros".

Segundo apunta a presentación do proxecto, a artista chama tamén a pensar "sobre a propia historia que, como disciplina, ao longo dos tempos, erixiuse, con maior ou menor acerto ou manipulación, en notaria e transmisora, chegando a converter a personaxes (maioritariamente masculinos) en ilustres, e aos feitos polos que foron recoñecidos en verdadeiros.

A exposición combina pezas de cerámica con debuxos alusivos á escultura. Nas primeiras, Santiso achega formas orgánicas e abstractas mediante o uso de pasta refractaria. Nos segundos, a serie Galería de personaxes ilustres retrata pedestais baleiros de diferentes feitíos e en distintos estados en cadros colgados da parede. Na mesma liña, en Questioned a artista retrata estatuas en varias pinturas que se apoian no chan da sala.