Comezan os traballos de restauración do cruceiro de San Domingos, en Pontevedra

Desde este luns 15 de abril o cruceiro gótico das ruínas do convento de San Domingos, en Pontevedra, está en proceso de restauración. A Deputación Provincial financia esta actuación que se centra la limpeza da peza, considerada un dos poucos cruceiros góticos existentes en Galicia. Os traballos, que se prolongarán durante unha semana, contan cun orzamento aproximado de 2.600 euros.

Segundo explica a Deputación, aínda que a peza non está en malas condicións, "presenta sucidade superficial debido a partículas exóxenas como po ou terra e contaminantes atmosféricos, así como deposicións das aves que se pousan nel para descansar". Como resultado disto, e en combinación coa humidade, a pedra acumula ademais liques, briófitas e plantas superiores "que están a
danar a pedra e a provocar unha alteración cromática".

Deste xeito "limparase en seco o cruceiro e eliminaranse os depósitos de aves, plantas e briófitas. A colonización biolóxica eliminarase con tratamento específico e retirarase e rebaixarase a reconstrución de cemento no pedestal. Tamén se realizará un rebaixe do terreo sobre o que se asenta o pedestal do cruceiro para deixar as súas letras talladas á vista".

O cruceiro, actualmente situado no xardín anexo ás ruínas do antigo convento, estaba situado orixinalmente na igrexa de San Bartolomeu o Vello, e trasladouse logo da destrución do templo.