De máxica cidade asolagada a turbeira prehistórica

A tradición popular sostiña que na praia de Arealonga (San Miguel de Reinante, Barreiros) atopábase a cidade asolagada de San Miguel de Vilachá, afundida por un castigo ou un maleficio. Nos días de trebón, contaba a historia, aparecían trabes e restos das árbores da vila asolagada. O que parecía ser unha das numerosas lendas de cidades malditas do litoral galego, tiña todo o sentido. Os trebóns amosan periodicamente na praia restos dunha turbeira na que se atopan restos de árbores dun antigo bosque e ósos e cornamentas de mamíferos, datados pola paleontóloga Aurora Grandal nuns 4.800 anos. Desta volta, a asociación Mariña Patrimonio, que leva anos documentando fotograficamente a aparición da turbeira nos invernos mariñáns, alertou á Dirección Xeral de Patrimonio da aparición de útiles líticos na zona de Penas Rubias, de posible cronoloxía paleolítica. Os obxectos arqueolóxicos foron recollidos polos técnicos da Xunta tras unha inspección do lugar.