Unhas xornadas estudan as novidades ao redor das vilas romanas de Gallaecia

Ao longo do país téñense localizado vilas romanas que dan conta da explotación do territorio trala Idade do Ferro. Moitas delas deron lugar a aldeas actuais, templos parroquiais ou transformaron o campo galego, dunha banda, ou multiplicaron a explotación do mar no caso do litoral. Con todo, o coñecemento sobre este tipo de xacementos aínda non é moi amplo. Para reflexionar sobre novas perspectivas neste campo arqueolóxico o Museo Provincial de Lugo organizou as VII Xornadas de Divulgación Científica do Patrimonio Arqueolóxico Lucense, co título “As villae na Gallaecia. Establecementos agrícolas-señoriais de época romana”. As xornadas celebraranse o 5 e 6 de abril no Museo Provincial de Lugo. No programa concorren investigadores de Galicia, Asturias e León que dan conta de visións de conxunto sobre o poboamento rural romano, como Carmen Fernández Ochoa, sobre a funcionalidade das vilas marítimas, como o profesor da Universidade de vigo Fermín Pérez Losada, ou sobre os espazos culinarios e o consumo alimenticio nestas vivendas, da man de Adolfo Fernández e Carlos Fernández respectivamente. Unha mesa redonda debatirá sobre o "pasado, presente e futuro das villae galegas. Estratexias, oportunidades e desafíos", no que participará Dolores Dopico (USC) e os arqueólogos Francisco Alonso Toucido e Luís F. López, que escavaron as vilas de Proendos e A Grade respectivamente. O prazo de inscrición xa está aberto.