Imaxe do vídeo de presentación da Rede Adival. Fonte: Xunta de Galicia
Un acto na Cidade da Cultura en Santiago de Compostela este sábado 16 de marzo serviu para dar a coñecer o proxecto da Rede Adival. Esta proposta da Xunta de Galicia desenvolverase ao longo de 2024 coa intención de "ampliar a oferta cultural nas vilas e localidades máis pequenas, garantir que contan cunha programación regular, impulsar proxectos que axuden a dinamizar a economía da contorna e fixar poboación, ao mesmo tempo que procura promover o turismo cultural no rural galego", segundo explica o goberno.
O programa parte da adhesión voluntaria de entidades públicas e privadas, en particular do terceiro sector, para desenvolver unha serie de actuacións que a Xunta adianta que chegarán "a máis de dous millóns de galegos e galegas". Segundo adiantou o presidente da Xunta en funcións, Alfonso Rueda, a intención é que o proxecto inicie a súa actividade ao longo dos primeiros cen días do seu novo goberno, e convidou ás preto de 5.000 entidades sen ánimo de lucro que se dedican á cultura no noso país a se vincular a esta iniciativa.
Segundo se avanzou na presentación do proxecto, a intención da Xunta é desenvolver entre abril e maior xuntanzas preparatorias coas entidades que poden participar do mesmo. Entre xuño e xullo elaboraranse os estatutos que rexerán a rede, que se publicarán entre setembro e outubro canda a aprobación da súa posta en marcha por parte da Xunta. Finalmente, para setembro está previsto a xuntanza constitutiva do proxecto.
Entre os obxectivos específicos da Rede está ampliar as capacidades dos sectores culturais que operan no medio rural, a favorecer a súa profesionalización e a creación de redes, potenciar a participación das mulleres na cultura neste ámbito ou implicar na actividade cultural tanto a persoas tituladas nas universidades e en ciclos de Formación Profesional como a retornadas da emigración.
