A Compañía de danza Fran Sieira estrea o espectáculo 'Ceib3'

O auditorio municipal de Cangas 'Xosé Manuel Pazos Varela' acollerá este sábado a estrea da última creación da Compañía de Danza Fran Sieira. "CEIB3" é o nome do espectáculo coreográfico deste bailarín e coreógrafo que coa súa anterior creación "DeMente" chegar a ter sete canddiaturas nos Premios MAX de artes escénicas e que acadou gran popularidade coa coreografía de acompañamento ás Tanxugueiras no Benidorm Fest. Xustamente unha das Tanxugueiras, Aida Tarrío, forma parte do elenco de bailaríns cos que conta habitualmente Fran Sieira e de novo nesta ocasión será unha das 8 persoas sobre o escenario, con ela como integrante tamén de ese elenco habitual estará Martín Mondragón, coñecido tamén polo seu proxecto musical propio como Mondra. A música do novo espectáculo corre a cargo de MounQup (Camille Hedouin) e Carlos Quintá.

Baixo a dirección artística de Fran Sieira e Sergio R. Suárez "Ceib3" reflexiona sobre as categorías de xénero e os seus estereotipos impostos socialmente, para establecer distancia coa normalidade e arrastrala cara as marxes, para dende aí propor e construír novas formas de entender o corpo e o movemento. Cuestiona as identidades de xénero normativas e hexemónicas, para comprender e compartir que o xénero opera sobre todos os corpos. Ao longo de 60 minutos de duración "Ceib3" afonda na relación entre o xénero e a nosa tradición, incluíndo, por suposto, unha manifestación cultural tan importante como o baile tradicional galego. Trátase de entender o que o xénero é para nós como individuos, como colectivo e tamén como sociedade. Logo da estrea na localidade natal de Sieira, o espectáculo chegará ao Teatro Principal de Santiago o día 9 de marzo, tras diso haberá que agardar a abril para velo en Ames, Vilagarcíad e Arousa e Narón e a maio para que chegue a Lugo e A Coruña.