Quiosco: Cadernos Ramón Piñeiro 46

Co título Francisco Fernández del Riego no río do tempo o Centro Ramón Piñeiro para a Investigación en Humanidades presentaba este 28 de decembro a entrega número 46 da súa publicación Cadernos Ramón Piñeiro. O lanzamento marcou o feche das actividades da Xunta de Galicia arredor de Del Riego, homenaxeado no Día das Letras Galegas 2023.

A entrega achega dezaseis artigos nos que diferentes sinaturas repasan os principais aspectos da vida e obra do autor de Lourenzá. Entre estas, Patricia Arias Chachero aborda a represión que sufriu o autor por parte do franquismo, María Dolores Cabrera e X. Francisco Domínguez Martínez analizan o papel do homenaxeado na biblioteca da Fundación Penzol, Perfecto Conde trata a literatura memorialística do autor ou Víctor F. Freixanes lembra o seu traballo na Real Academia Galega.

Xesús Alonso Montero asina un texto sobre as relacións de Del Riego co exilio cultural galego, mentres Miguel González Somovilla aborda as lúas ligazóns con Cunqueiro e Mario Regueiro achega unha análise sobre "Fernández del Riego como crítico ante as Novas Narrativas". Canda a estes contidos, o volumen achega datos sobre o traballo de Del Riego como tradutor, historiógrafo e lector cosmopolita ou o seu interese pola filosofía galega e pola figura de Prisciliano.