Dous debuxos de Urbano Lugrís engádense á colección do Museo Massó

O Museo Massó de Bueu engade desde o pasado venres á súa exhibición permanente dous debuxos do artista Urbano Lugrís (1908-1973). As obras de temática marítima 'A arca de Noé' e 'Veleiro', foron adquiridas pola Xunta de Galicia e á súa presentación acudiu o director xeral de Cultura, Anxo Lorenzo. Con estes dous novos bosquexos, ademais da adquisición no 2018 dun debuxo para a publicidade de Pescanova e varias doazóns realizadas pola familia Massó, a Consellería de Cultura, Educación, FP e Universidades quere "completar o relato da futura sala da exposición permanente dedicada a Urbano Lugrís", concluíu o director xeral de Cultura.

Estas obras do pintor súmanse á colección do Museo Massó que xa conta con seis lenzos do artista feitos para o comedor das empregadas, a serie completa de bosquexos que realizou Lugrís para o proxecto da capela dos Santos Reis, anuarios de Vigo e libros como 'Los paisajes iluminados', con portadas e ilustracións da súa autoría. Ademais está o Políptico da Navegación", obra foi realizada por Lugrís no ano 1944 por encargo de José María Massó e executada sobre 36 pezas de cerámica, a modo de azulexos, encaixadas nunha estrutura e marco de madeira cun tríptico no centro. Nel faise un percorrido pola historia da construción naval. No museo tamén está unha carta de Lugrís dirixida a Antonio Massó e unha fotografía tomada en Vigo, diante do edificio da empresa e en compañía con Fernado Massó. Todas estas obras e documentos pertenceron ou teñen a súa orixe a partir da iniciativa da familia Massó.