A décima segunda entrega de Mazarelos, a revista de historia e cultura, está xa á venda. O novo número aborda diferentes cuestións do patrimonio inmaterial, como o artigo de Rafael Quintía sobre os mitos dos secuestradores de nenos na nosa cultura, ou o de Francisco Bermúdez a abordar a transmisión da música tradicional galega.
Pola súa banda, os investigadores Zósimo López, comisario da exposición Botamos un baile? sobre a evolución das orquestras de verbena, e Íñigo Sánchez-Fuarros, coordinador do proxecto Palcos no Centro Superior de Investigacións Científicas, manteñen nas páxinas desta entrega unha conversa sobre a verbena e as festas desde o punto de vista material e inmaterial.
No ámbito histórico, Laura Rodríguez achega un artigo sobre a aristócrata Ilduara Eriz e os espazos que ocuparon as mulleres na Idade Media. Luis Bermúdez, á súa vez asina un artigo sobre o escultor barroco Francisco Rodríguez. Un repaso da traxectoria da Asociación Cultural O Carballo de Taboada, creada en 1985, a cargo de Alexandre Varela fecha esta entrega.
Con capa a cargo de Blanca Vila, o volume conta con 74 páxinas e sae á venda por un prezo de 9 euros.
