As estreas dos festivais internacionais e as peliculas vetadas nas distibucións comerciais chegan a Santiago en novembro con Cineuropa. E este ano faino acadando o rango de Festival. 75 películas, 30 estreas, un maratón, proxeccións en centros culturais de Santiago e unha macroproxección no pabillón de Santa Isabel compoñen o cartel para estes trinta días de cine.
Festival e premios
Houbo que esperar 14 edicións para que Cineuropa tivera rango de Festival. E como tal haberá gala de presentación, estatuiñas e premios. Sen embargo, fiel á súa esencia, Cineuropa non ten carácter competitivo e será o público co seu voto, o que decide quen leva os catro millóns e a estatuiña do escultor santiagués Francés. Os outros galardóns son para Marisa Paredes, pola súa traxectoria profesional, José Luis Borau por toda unha vida adicada ó cinema, e a distribuidora galega de Emilio Barros polo seu apoio ó programa compostelano dende os seus inicios. Sen embargo, o festival non terá nin estrelas, nin glamour para, segundo José Luís Losa, non lucir a cara máis escura do audiovisual.
Seccións e prezos
A sección oficial, panorama internacional, México insurxente, Cine como documento histórico, Cinefilias e a maratón compoñen o programa polo que discurrirán as 75 proxeccións que se exhiben este ano. Uns filmes que segundo o organizador Luís Losa, "esperan manter o listón acadado en anos anteriores. De feito a organización espera manter o ritmo do ano anterior no que máis de trinta mil espectadores pasaron polas salas do Teatro Principal. Malia o rango de festival, a organización pretende un espectáculo aberto a todo o mundo, polo que mantén a súa política de prezos habitual. 400 por sesión e tres mil polo bono de dez pases.
