Pezas da exposición Tesouros Reais. Fonte: Cidade da Cultura
Entre marzo e agosto 2024 o Museo da Cidade da Cultura, en Santiago de Compostela, acollerá a exposición Tesouros reais. Obras mestras do Museo de Terra Santa. A Consellería de Cultura anunciaba este 12 de decembro o acordo polo que o centro do Gaiás será a única parada estatal destsa mostra itinerante, que comeza na Fundación Gulbenkian de Lisboa o seu percorrido por diferentes cidades de Europa e América.
Un acordo coa Gulbenkian e mais coa Custodia de Terra Santa de Xerusalén permitirá achegar ao noso país esta iniciativa, que o conselleiro Román Rodríguez cualificou como "un dos principais proxectos expositivos do Museo Centro Gaiás para 2024".
Segundo Rodríguez, a exposición amosa os materiais que conformarán o núcleo do futuro da colección histórica do Terra Sancta Museum de Xerusalén. A súa visita a Galicia, achegará "a oportunidade única de contemplar obras conservadas durante séculos pola Custodia Franciscana da Terra Santa de Xerusalén, doazóns realizadas ao longo de 500 anos polas monarquías máis poderosas de Europa, desde cálices, xoias, códices, baldaquinos, lámpadas... pezas únicas, de metais e pedras preciosas, elaboradas polos mellores ourives, artesáns e artistas da época".
Na súa visita a Galicia, este material complementarase con "pezas arqueolóxicas, pictóricas e outras obras senlleiras de institucións galegas como o Museo de Terra Santa do compostelán Convento de San Francisco e o Museo das Peregrinacións" canda a materiais achegados polo Museu Calouste-Gulbenkian, segundo adiantou a Consellería de Cultura.
