Axudas do Estado a tres longametraxes e cinco curtametraxes galegas

O Instituto da Cinematografía e das Artes Audiovisuais (ICAA), do Ministerio de Cultura ven de resolver a concesión de axudas á producción audiovisual en diferentes liñas de apoio, con incidencia no sector galego en todas elas. Cinco producións de curtametraxes e tres de longametraxes acceden deste xeito ás axudas estatais acadando en total 3.538.186,88 de euros en fondos estatais.

Así, no caso das subvencións a curtametraxes xa realizadas no ano en curso, cinco producións galegas recibirán axudas de entre 49 seleccionadas na resolución dentro da convocatoria correspondente do Estado, obtendo entre as cinco 66.186,88 euros. Desta liña benefícianse as produtoras Zeitun Films por 'Sen ti'; Mordisco Films por 'A rabia'; Rebordelos, por 'Non te vexo'; Gaita Filmes por 'Ulises' e Cósmica Producións por 'O neno sardiña'. A estas cinco poderíamos engadir a subvención concedida ao vigués Guillermo Oliveira pola súa producción 'Sauerdogs', a través da súa produtora Yukon Winter, con sede en Madrid.

Tres longametraxes por vir
No relativo ás longametraxes, o organismo estatal ven de facer público o segundo procedemento polo que se conceden as axudas xerais á producción de longametraxes sobre proxecto. Con esta nova resolución, esta liña de subvencións do Ministerio alcanza a tres vindeiras producións coproducidas por empresas galegas. Repartindo entre as tres 3.472.000 euros. Neste caso os proxectos de producións e as produtoras beneficiadas serían o filme 'Leo & Lou' de Aurora Audiovisual e Frida Films e coprodución con Zeta Audiovisual; 'Golpes 1982' de Vaca Films; e 'Rondallas', longametraxe producido polo noiés Ramón Campos a través de dúas das súas empresas galegas (Teatrlogía Movie e Mr.Fields and friends Cinema) e de Bambú Producciones.