Presentan un mapa sobre artivismo en Galicia

O artivismo é unha combinación dos conceptos 'arte' e 'activismo', polo cal proponse o uso de medios artísticos como xeito de transformación social e como "forma activa de loitar contra as inxustizas e desigualdades na sociedade". Así o explica a Asemblea de Cooperación pola Paz de Galicia (ACPP) que presentou o pasado 4 de novembro unha 'cartografía social' da arte activista en Galicia. Co apoio da Secretaría Xeral de Igualdade, a entidade presentou un mapa realizado pola cooperativa Arabías, con dúas versións, en papel e dixital. O mapa presenta información, ligazóns e detalles sobre proxectos que se están levando a cabo por todo o territorio, e que involucran perfís e colectivos moi distintos, como redeiras, compañías teatrais, pintoras ou festivas entre outros.