Obra de Caruncho na mostra Geometria Mundi
A sede de Afundación na Coruña acollía este 7 de novembro a inauguración de Caruncho. Geometria Mundi. A exposición propón unha retrospectiva polas diferentes disciplinas creativas que abordou Luís Caruncho ao longo da súa carreira mediante máis de cen obras a incluír esculturas, pinturas, deseños en aceiro, pezas en madeira ou fotografías.
O proxecto, que se pode ver ata o vindeiro 17 de febreiro, percorre a traxectoria deste creador coruñés, falecido en 2016, con pezas que van desde 1949 ata 2012 e foi comisariado por Juan de Nieves. Segundo sinala o comisario a exposición foi construída emulando "o mesmo espírito" co que o artista "viviu e traballou", indo "desde o micro ao macro". Segundo el, Caruncho disolveu coa súa obra "as fronteiras entre a arte con maiúsculas e as formas que nos acompañan na esfera cotiá, poñendo de relevancia, en definitiva, unha visión honesta e desprexuizada sobre a función social da arte".
A acompañar as pezas artísticas, na sede de Afundación poden verse tamén "pezas de carácter documental que reflicten o universo creativo dun dos artistas máis coherentes e interesantes do panorama artístico español do século XX: fotografías, maquetas, debuxos ou múltiples publicacións", entre outros materiais.
Dentro da proposta destaca a chamada "Sala Metafísica", que permite introducirse fisicamente no universo creativo do artista a partir de obras, fotografías, obxectos de deseño e documentos, a achegar información visual e sonora sobre o artista.
Segundo explica a presentación do proxecto, Caruncho "constitúe unha das personalidades de maior relevancia na escena artística e cultural española na segunda metade do século XX. As súas contribucións non só se cinguen á súa intensa actividade como pintor e escultor da chamada abstracción xeométrica -ou do posconstrutivismo-, senón tamén ao seu labor como deseñador nun amplo rango de campos, e moi especialmente nas súas continuas achegas desde e para a arquitectura".
