Jon Cazenave encabeza o cartel do VII FFoco

A Fundación Seoane, na Coruña, acolle este 10 de novembro a inauguración da sétima xeira do FFoco. O encontro de fotografía amplía a súa actividade a incluír unha xornada de proxeccións na Filmoteca de Galicia e novas sedes. O programa, que se desenvolve ata o 31 de decembro, terá no vasco Jon Cazenave, un dos fotógrafos máis recoñecidos do panorama internacional, un dos seus principais fotos.

Deste xeito, Cazenave protagoniza a exposición Ama Lur na Fundación Seoane. Nesta serie, o artista explora a súa identidade "e sitúase dentro da paisaxe, para habitala e poder comprendela. O corpo enteiro forma parte da terra, e así, recompila un novo rexistro de imaxes, inmerso no máis grande dos silencios e a maior das contemplacións". Arredor desta perspectiva, o festival quere explorar "a relación entre os lugares e as identidades; sobre as lindes, tan tipicamente galegas, entendidas como as liñas reais ou imaxinarias para estremar terreos; e sobre os límites da propia fotografía".

Nesa liña, a Filmoteca de Galicia acolle o sábado 11 unha proxección de traballos de autoría galega, cos paseos de María Meseguer, as exploracións de Sara Guinta mediante o Google Street View, o retrato da Mariña que fai Hoodoolab Team (Francisco López Riopedre e Kathleen Day) e mais a reflexión sobre as migracións que realiza Vicente Fraga. A sesión complétase na noite desa xornada na Fundación Seoane a amosar traballos de Rita G. Rivera, Lemos + Lehmann, Fran Rodríguez Casal e Anxo Santiago.

Desde Sudamérica, o programa acolle a presentación dos novos traballos de Enea Lebrun sobre as tribus indíxenas nos territorio bañados polo río Chagres e Isabela Muci, encol dos espazos artificiais nos que se ofrece una representación domesticada e idealizada da Natureza, estarán tamén presentes no encontro.

No marco do festival, a fotógrafa Tania Vila elaborará un proxecto a retratar praceiras e clientes do mercado de San Agustín que se exporá neste mesmo espazo. Arty! Market, pola súa banda, acollerá Unha viaxe a marte, proxecto performativo a cargo de Simone Maestra, Marta Durigon, Cesar L Seoane, Sol Mariño e Amaya Roldán, entre outros, que reivindica o acto fotográfico da toma da imaxe a realizar retratos con cámara de gran formato e película instantánea a quen se presente no lugar.

A feira editorial do encontro celebrarase na Fundación Seoane a contar con algúns dos selos máis destacados do panorama, entre eles Fabulatorio, Alauda Negra, Estraperlo Editora, Amor de Madre, Dispara ou La Mosca. A proposta formativa desta xeira irá a cargo de Laura Alonso Carracedo e Pep Páramos, que impartirán un obradoiro sobre edición fotográfica.