Sete cadros do pintor Roberto González del Blanco pasan a incluírse no Catálogo do Patrimonio Cultural de Galicia

Quen pase pola rúa da Rosa, en Santiago de Compostela, terá apreciado un singular chalé que incorpora escultura de aspecto medievalizante nas fiestras e nas cornisas. Trátase do chalé construído no seu momento polo pintor Roberto González del Blanco, unha figura de relevancia nas décadas centrais do século XX como pintor de temas costumistas e naturalistas. A Xunta publica hoxe no DOG a incoación do procedemento de inclusión de sete obras conservadas nesa casa para formaren parte do Catálogo do Patrimonio Cultural De Galicia. O procedemento iniciouse a petición dos propietarios das obras en novembro de 2022. Trátase das obras Autorretrato, Retrato da súa nai, Místico, Vodas de Prata, Muiñeira, A nena das mazás, Encambando xoubas e Crisantemos brancos. Unha delas, Místico, xa figuraba no catálogo desde o ano 1998. O informe, asinado pola directora do Museo de Belas Artes da Coruña, destaca que as obras "posúen un valor cultural notable que xustifica a súa inclusión no Catálogo do Patrimonio Cultural de Galicia". Cada unha das obras estará catalogada como separado e non formando parte dunha colección. González del Blanco (León - 1887, Santiago de Compostela - 1959) foi un pintor que destacou pola súa pintura do realismo costumista, pero tamén pola súa etapa inicial, orientalizante e arcaizante e resultado das súas dilatadas viaxes por Oriente.