Na súas aventuras, os personaxes percorrerán os diferentes ecosistemas do parque, representados en mapas, relacionándose coas especies animais e vexetais presentes e coñecendo espazos patrimoniais deste territorio e elementos como as embarcacións tradicionais. Ademais, deberán enfrontarse a criaturas lendarias vencelladas aos espazos do parque.
Segundo recolle o web do proxecto, o xogo conta con quince tipos de seres máxicos, dos cales oito poden ser empregados polos xogadores. Canda a eles quince especies de aves, catorce de mamíferos ou trece de fauna mariña, entre moitas outras, conforman un universo de xogo no que tamén teñen relevancia espazos como castros, igrexas, covas ou xacementos arqueolóxicos.
O vigués Pablo Culebras, que xa realizara un xadrez ambientado nas incursións vikingas en Galicia, asina esta proposta. O proxecto contou co apoio dos fondos de Axudas á Área de Influencia Socioeconómica do Parque Nacional das Illas Atlánticas de Galicia. A intención é mellorar o coñecemento da poboación desta zona sobre as illas do parque e estreitar a súa relación co mesmo.
O xogo publícase en catro versións, que corresponden a cada unha das illas que fan parte do Parque Nacional. Unha edición do xogo distribuirase de balde en bibliotecas e centros de ensino dos concellos de Vigo, Bueu, Vilagarcía de Arousa e Ribeira, e outros estarán dispoñibles no Centro de Visitantes do Parque Nacional, en Vigo. Ademais, o regulamento do xogo está dispoñible na propia web da iniciativa.
