Fotografía do proxecto Orixe de Glorianna Ximendaz.
O proxecto fotográfico Orixe que aborda "o problema de abusos sexuais e violencia que asolou as mulleres da familia da autora, incluíndo a súa propia experiencia en primeira persoa" valeulle a Glorianna Ximendaz facerse co XI Premio Galicia de Fotografía Contemporánea. A organización do certame daba a coñecer na tarde deste 25 de outubro o fallo que recoñece esta creadora de Costa Rica.
O proxecto gañador "pretende recuperar as historias familiares que foron silenciadas, desde o empoderamento, a resiliencia e a denuncia" a través "de poderosas imaxes e a exploración de lembranzas pasadas". Segundo destacou o xurado do galardón, que convoca a Asociación Outono Fotográfico co apoio da Xunta de Galicia e a Vicepresidencia da Deputación de Lugo, a obra de Ximendaz "visibiliza o grave problema ao que se enfrentan as mulleres da América Latina, onde se enfrontan a estatísticas asombrosas de violencia de xénero e feminicidio".
Con este galardón, a autora verá producida unha exposición do seu traballo que itinerará durante dous anos ademais da edición e distribución do correspondente catálogo. O Pazo de San Marcos da Deputación de Lugo acollerá o vindeiro mes de decembro a inauguración da mostra correspondente a este galardón.
O xurado do premio estivo composto por Rita Ibarretxe, historiadora da arte, curadora independente e fotógrafa; Paulo Cacais, director artístico do festival Álbum, Carla Bacellar, codirectora do festival Encontros da Imagem, Xosé Lois Vázquez, presidente da Asociación Outono Fotográfico e mais o curador e profesor Vítor Nieves. Por parte das institucións patrocinadoras, paraticiparon Eduardo Ochoa, do Grupo Fotocinematográfico Fonmiñá, e Eva Torres, Directora Técnica de Espazos Expositivos e Áreas Museísticas do Concello de Ourense.
Ademais do galardón a Ximendaz, o xurado declarou finalistas desta xeira os proxectos presentados por Emiliano Dantas, Alvaro Deprit, Ana Núñez e Lisa Pram.
