Trinta artistas expoñen interpretacións da desaparecida Virxe do Cristal

A desaparición en 2015 da Virxe do Cristal de Vilanova dos Infantes (Celanova) deixou un baleiro difícil de encher. A pequena figura única do século XVII, que consiste nunha imaxe da Virxe María inserida nun ovalo de vidro foi obxecto dun roubo na casa reitorial que tamén levou por diante a vida do párroco, Adolfo Enríquez. As investigacións non acadaron éxito e foron obxecto de arquivo en 2020. A peza que tanto culto espertou e que foi incluso inspiración para un poema homónimo de Curros Enríquez non volveu e descoñecese onde acabou. Da inspiración que causaba tira agora unha exposición artística aberta na Torre de Vilanova do Infantes e que non pretende remprazala senón manter presente a fonda pegada da peza. Máis de trinta artistas recrean a peza para esta mostra inaugurada onte, cada un deles coa súa técnica, materiais e perspectiva artística. O escritor e xornalista celanovés Xosé Manuel del Caño promoveu esta iniciativa para manter a presenza da imaxe viva para a que contou coa colaboración do Concello de Celanova e máis da Fundación Fundación Curros Enríquez.

Asinan representacións da peza para esta exposición artistas moi diferentes entre si e con achegamentos moi diversos ás artes plásticas usando dos materiais máis variados. O listado completo está composto por Xulia Ares, Joaquín Balsa, Moncho Borrajo, Manuel Buciños, Manuel Catoira, Xosé Cid, Ramón Conde, Luz Darriba, María Manuela Díaz Orjales, Manuel Dopazo, Angy F.S., Ánxel Huete, Francisco Leiro, Maribel Longueira, Urbano Lugrís, Arturo Baltar, Acisclo Manzano, Miguel Anxo Martínez Coello, Baldomero Moreiras, Rochi Nóvoa, Xurxo Oro Claro, Emma Pedreira, Alfonso Pexegueiro, Antón Pulido, Baldo Ramos, Leandro Sánchez, Carmen Senande, Felipe Senén, Tareixa Taboada, Lucila Vázquez Gulías, Carmucha Vázquez Prats, Manuel Vidal e a Sociedade Filatélica e Numismática Miño. No cantio dunha obra propia, a escultora Soledad Penalta aportou á mostra unha imaxe mariana de prata, con base de mármore que tamén foi roubada, como pasou coa Virxe do Cristal e que ela mercou á Administración en Estados Unidos, despois de que fora recuperada, e tróuxoa para Galicia. Penalta deu a imaxe en doazón ao Concellode Celanova mentres non se recupere a Virxe do Cristal, unha esperanza que aínda manteñen organizadores e artistas participantes.