Baiuca
Ven de presentarse a programación da vindeira edición do mercado das músicas Womex (Worldwide Music Expo), o máis importante encontro mundial de música folk e de raíz, que terá lugar na Coruña do 25 ao 29 de outubro. A música galega terá unha importante presenza nos escenarios deste encontro internacional que volve a Galicia tras os encontros de 2014 e 2016 en Santiago de Compostela. O proxecto Baiuca forma parte da selección oficial que cada ano elixe un xurado internacional, mentres que Ailá e Trilitrate actuarán no escenario Atlantic Connections, instalado no Teatro Rosalía Castro e a través do que se celebrarán os fondos vínculos culturais e históricos entre Galicia e América Latina. Ademais, a organización acaba de anunciar que Caamaño & Ameixeiras actuará xunto con Karmeto (Castela-A Mancha), Niño Josele (Andalucía) e Tarta Relena (Cataluña) no espectáculo inaugural 'Resounding Picasso: Celebrating de Master’s Journey'. Nesta Noite Inaugural, Womex súmase á conmemoración dos 50 anos do pasamento do pintor Pablo Picasso, ofrecendo unha viaxe musical pola súa vida e obra da man de catro bandas que representan os lugares que marcaron a súa infancia e xuventude.
O evento contará, ademais da presenza de milleiros de axentes internacionais, tamén cunha nutrida delegación artística e empresarial galega no recinto feiral que se instalará no Palexco. Na presentación do programa o representante da Xunta, o director de AGADIC Jacobo Sutil, avanzou que a Consellería de Cultura, Educación, FP e Universidades está a traballar na organización do programa Focus Galicia, que terá lugar nos días previos ao inicio de Womex para incidir no obxectivo de aproveitar "as moitas portas que se abren para a nosa música grazas a unha feira destas características". Con tal fin, convidarase unha selecta escolma de programadores de festivais internacionais a participar nun "evento experiencial de identificación da música co territorio" e para favorecer, deste modo, a contratación de artistas e bandas da nosa Comunidade. Como adiantou Sutil, proximamente darase a coñecer a selección de 10 proxectos musicais, realizada a partir dunha convocatoria pública, que ofrecerán outros tantos showcases como parte central do conxunto de actividades de Focus Galicia.
