Logo dun intenso traballo de recreación de coreografía e traxes, a Danza da Farsa de Damas de Galáns voltará á parroquia viguesa de Santa Cristina Lavadores despois dun século. A Asociación o Fiadeiro foi a responsable desta recuperación, que desenvolveu da man da irmandade responsable da organización das festas.
Un total de 25 persoas participaron no proceso de recreación desta danza branca, semellante a outras existentes no país. O proceso partiu da memoria oral da veciñanza e apoiouse nunha fotografía conservada no Museo Etnográfico de Ribadavia que permitiu coñecer os traxes empregados nas últimas representacións orixinais da danza, hai máis de 90 anos.
Para recoller o baile, organizado en tres fileiras alternadas de homes e mulleres, a investigación recuperou material da formación Xacarandaina, da Sección Feminina de Falanxe ou do Cancioneiro de Casto Sampedro, que describía pasos, traxes e formacións desta manifestación de cultura popular.
O vindeiro 24 de xullo está previsto que se execute a danza no marco das festas de Santa Cristina. Para 2024 a representación desenvolverase polas festas de San roque e incluirá ademais a "carreira da Rosca", un enfrontamento entre danzantes con grandes brincos.
