A faceta criminal literaria de Vigo a debate nunha xornada

"Vigo Noir, cidade ilustrada" é o nome dunha xornada que o vindeiro día 18 de maio reunirá a escritores e investigadores na cidade olívica para afondar nos motivos e as condicións que se dan e se deron para que diferentes creadores literarios escollesen Vigo como escenario das súas novelas criminais. Autores como Domingo Villar, Pedro Feijoo, Manuel Forcadela, Ledicia Costas ou Beto Luaces, elixiron a cidade como escenario criminal e a converteron, nalgún caso, mesmo nun personaxe máis da historia. O evento terá lugar no Edificio Redeiras no Berbés e nin a data nin o lugar son unha casualidade, xa que coincidirá co primeiro cabodano do falecemento do escritor Domingo Villar (Vigo, 1971-2022), e trátase dunha zona moi presente nas andainas do inspector Leo Caldas, protagonista das súas obras, polo que o evento servirá tamén como homenaxe ao escritor vigués.

O evento, aberto ao público, está organizado pola Facultade de Filoloxía e Tradución e conta coa colaboración das vicerreitorías de Estudantado e Empregabilidade e de Extensión Universitaria da Universidade de Vigo e forma parte do ciclo Conversas coa nosa xente. A cita será á 19.00 horas e contará coa participación dos escritores Pedro Feijoo, María Xosé Porteiro e Manuel Forcadela, todos eles con novelas ambientadas en Vigo, e do profesor da Universidade do Minho Xaquín Núñez Sabarís, premio Ramón Piñeiro de Ensaio 2020 e primeiro autor en estudar a categoría Vigo Noir nos estudos literarios. Detrás desta iniciativa están José Montero Reguera, decano da Facultade de Filoloxía e Tradución; Blanca Miranda Rodas, estudante de doutoramento que está investigando sobre a tradución do Vigo Noir e Iolanda Galanes Santos, profesora da Facultade de Filoloxía e Tradución.